Қишлоқ хўжалик технологияларига бағишланган республика илмий-амалий конференцияси бўлиб ўтди

 

   

2017 йил 13 май куни институтда “Юқори самарали қишлоқ хўжалик машиналарини яратиш ва улардан фойдаланиш даражасини ошириш” мавзусида республика илмий-амалий анжумани ўтказилди.

Анжуманнинг асосий мақсади: Республика қишлоқ хўжалигини ривожлантириш, уни механизациялаш даражасини оширишда илм-фаннинг ўрни ва аҳамиятини кучайтириш, соҳада фан ва техниканинг муҳим илмий ва технологик муаммоларини ҳал этиш, илмий-техникавий ҳамкорлик кўламини кенгайтириш, илм-фан соҳасининг барча жабҳаларида олимларнинг фаол иштирокини таъминлаш, илм-фан соҳасига иқтидорли ёш кадрларни ҳамда инвестицияларни жалб қилиш.

Тадбир ташкилотчилари: Ўзбекистон Республикаси Қишлоқ ва сув хўжалиги вазирлиги, Ўзбекистон қишлоқ хўжалиги илмий-ишлаб чиқариш маркази, Қишлоқ хўжалигини механизациялаш ва электрлаштириш илмий-тадқиқот институти.

Конференция ишида қатнашган ташкилотлар: ЎзР ҚСХВ, ЎзҚХИИЧМ, “Технолог” ИИЧБ, БМКБ “Агромаш”, СКБ “Трактор”, УзГЦИТТ, Самарқанд ҚХИ, НамМПИ, Гулистон ДУ, ТошДТУ, Термиз ДУ, Қашқадарё КТБ, СПЭваКИТИ, ЎзРОТВКХКРМ, ООО НСИМ, Чорвачилик ИТИ, кўплаб бошқа олимлар, жамоатчилик ва Ўзбекистон миллий телерадиокомпанияси вакиллари.

Анжуманнинг пленар мажлисида ЎзҚХИИЧМ бош директорининг муовини, профессор Б.Холиқов ва БМКБ “Агромаш” бош илмий ходими, профессор Р.Д.Матчоновлар табрик сўзлари билан чиқишди. Шундан сўнг кун тартибига мувофиқ ҚХМЭИ директори А.Ражабовнинг “Институт олимлари томонидан тадқиқот лойиҳалари бўйича 2016 йилда олинган фундаментал, илмий-амалий ва инновацион натижалар” мавзусидаги маърузаси, проф. М.Тошболтаев, акад. А.Ҳожиев, проф. А.Тўхтақўзиев, т.ф.н. А.Қорахонов ва бошқа олимларнинг маърузалари тингланди.

    

 

 

Куннинг иккинчи ярмида анжуман иштирокчилари 4 та секцияга бўлинган ҳолда анжуман ишини давом эттирдилар ва секцияларда 60 дан ортиқ маърузалар тингланди:

I Секция: Энергетика, транспорт ва юклаш-тушириш воситалари ҳамда тупроққа ишлов бериш ва ерларни экишга тайёрлаш машиналари;

II Секция: Экиш, ўғитлаш ва ўсимликларни парваришлаш машиналари;

III Секция:  Фермер ва деҳқон хўжаликларида маҳсулот етиштириш ва унга дастлабки ишлов берувчи кичик техника воситалари ва қурилмалари, чўл яйловлари учун машиналашган технологиялар ҳамда қишлоқ хўжалиги ишлаб чиқариши учун электротехнологиялар;

IV Секция: Экинлар ҳосилини йиғиштириш машиналари, қишлоқ хўжалик машиналарини таъмирлаш, уларга техник сервис кўрсатиш ва машиналардан фойдаланиш даражасини ошириш ҳамда янги техника воситаларини лойиҳалаш, уларнинг саноат нусхаларини ишлаб чиқариш ва қабул синовларидан ўтказиш.

 

 

 

Маълумот киритилган сана: 16.05.2017